ياهلي الروح تعبانه..جيبوا لي دكتوووور نفسيه..

M!SS HTLERH الخميس يونيو 02, 2011 9:23 am

داق لطمه ونظارات سود في الليل ولابس بالطو بيج في عز الصيف .. وارتعش ويالله امشي صار لي يومين ماشيشت من كثر التفكير .. وراسي صاكني .. ووصلت العياده وطليت في الداخل ماشفت احد .. دخلت بشويش الا بسم الله علي موظفة الاستقبال موقفه قدامي .. :

احم .. لو سمحتي يالشيشه ..
شيشه بعينك يائليل الأدب ..
آسف آسف سستر والله من الخرمه بقول يالشيخه قلت يالشيشه .. معليش سامحيني اختي .. اول مره ادخل عياده نفسيه ومرتبك شوي ..
ايوه ايوه .. انتو كيدا دايماً بتشوفوا الست زي الشيشه بتشفطو فيها وترموها .. قتكم نيله
اختي يرحم والديك قلت آسف خلاص .. بعدين اللي بيشفطك انتي يبي له " لي " وايت ..
بلاش ئلة أدب وئول انتا عاوز ايه دلوئتي ..
عاوز نص دقاق مسلوسه ..؟! الله يهديك يعني داخل عياده نفسيه وش ابي ؟ ابي الدكتور ..
طيب ومالك بترتعش ولابس بالطو في الحر ده وكمان مخبي وشك ؟
معليش اختي خفت احد يعرفني ويشوفني في العياده .. فشيله ، عشان كذا جاي متنكر ..
يا اوستاز دي عياده نفسيه محترمه مش عيادة اجهاض وحاقات ممنوعه ؟!
اجهاض ؟ احترمي نفسك لو سمحتي .. ولاتطالعين بطني ترى منتفخ هوا مهوب شي ثاني ..
طيب ماتستخفش دمك لو سمحت .. اسمك ايه ..
اسمي سلطان ..
سولطان إيه ..
سلطان اختي بتسكين السين .. مو بالضم
سلاطان ايه ..
سلاطان يخمك ياشيخه .. اقولك سلطان سلطان ..
سولطان سلاطان ماكلو ماشي انتا بتتلكك عشان تطول معايا ؟
اطول معاك ؟ ياللمبي مسوي نفسه بنت .. ؟! اقولك .. اكتبي سليطين
سيليطين ايه ..
بدون ياء قبل اللام لو سمحتي .. ولا اقولك .. هاتي الورقه انا اكتب بياناتي ..
طيب خلص بياناتك وروح اترزع فـ الصاله اللي هناك لحد ماييقي دورك ..
*****
خلصت بياناتي .. ورحت لصالة الانتظار .. :

احم .. السلام عليكم ..
عليكم السلام ..
معليش اختي .. هذي صالة انتظار الرجال ؟
شايفني لابسه ثوب وشماغ ؟ وجالسه اتميلح والعب بمفتاح اللكزس ؟؟ صدق مجتمع ذكوري معفن ..
آسف اختي والجواب مايحتاج منك محاظره .. بس مكتوب برا يمين الباب " صالة انتظار الرجال " ..
اصلاً ماعندهم الا هالصاله ولو ناظرت يسار الباب مكتوب " صالة انتظار نساء " ..
يعني خليطي ؟
ايه خليطي .. واجلس محترم ولا تساقط ..
وش اللي لاتساقط ؟؟ لو سمحتي احترمي نفسك .. انا انسان نظامي وقاص رقم الانتظار من الممرضه ..
ايه لاتساقط بس وخلك في مسارك وانا في مساري وكل واحد يلتزم بمساره ..
وش تقول ذي ؟ ( تذكرت اني فـ عياده نفسيه ) الحمدلله رب العالمين وش جابني انا بس هنا ..
على العموم حاضر حاضر ..
( بعد ثلاث دقايق صمت ) ..
انت وش جابك هنا ؟
هنا وين .. قصدك العياده ؟
لا المواقف.. ماتدري انها للحريم ؟؟ صدق قليل أدب
اختي الله يهديك لسه سائلك من شوي وقلتي خليطي ؟
خليطي بعينك ياقليل الحيا .. قم طس وقف عند الرجاجيل .. صدق ناس ماتستحي
معليش اختي بدون صراخ بقوم اطلع .. اف .. وش هالحرمه النفسيه ؟
<--- وهو طالع يشيك على يسار الباب ومالقى لوحة انتظار النساء ؟؟
*****
رجعت لـ اللمبي ..

لو سمحتي سستر .. وين صالة انتظار الرجال ؟ مكتوب هناك بس لقيت فيه بنت جالسه ؟
ايوه ايوه دي مسكينه عندها حاله نفسيه صعبه .. عاوزه تسوء السياره ومشاركه في حملة سأقود سيارتي بنفسي ..وقاها حاله نفسيه بعد مافشلت الحمله .. مسكينه كان حلمها تسوء عربيه .. ياحبة عيني
طيب خليها تسوقك يالبيجو ..
اخرس خالص و اترزع عندي هنا مايخالفش ( يعني مايخالف ) ..
( بعد خمس دقايق ) ..
سستر .. سستر ..
ايوه .. عاوز ايه تاني ..
شوفيها المسكينه جايه لنا .. ورافعه يديها كأنها ماسكه دركسيون وش اسوي وش اسوي ياسستر ..
أوعد آعد .. وماتتحركش .. اصلها تتخيل نفسها بتسوء دلوئتي ..
يمه .. جت لمي وش تبي ذي ؟
لو سمحت .. هذا موقفي انا جايه قبلك .. طلع سيارتك ..
آسف اختي انا جاي قبلك لو سمحتي بدون كثرة كلام ..
ايه ادري لما شفتني داقه اشاره بوقف وقفت مكاني تبي تضايقني عشان مقهور ان حرمه تسوق ..
صدق مجتمع ذكوري متخلف ..

طيب اختي وقفي هنا مكان البيجو اللي جبني بيطلع الحين ..

<--- يأشر على السستر وزعلت : بيجو ايه يامعفن .. ( قاعد اغمز لها يعني مشيها مشيها لين تروح هالمسكينه ) ..
شفتها بتطول نفسيتها .. قلت ويويويويويوي ( سويت نفسي دوريه ) ..
وفحطت فحطت مكانها ثم انطلقت للصاله وراحت تلبق هناك .. قصدي رجعت جلست في الصاله ..

M!SS HTLERH الخميس يونيو 02, 2011 9:24 am

( بعدعشر دقايق ) ..
طلع الرجال اللي كان عند الدكتور .. كان يمشي بشويش .. وجلس في صالة الانتظار
ودخلت الحرمه اللي تبي تسوق عند الدكتور ..
قلت للمبي .. وش فيه يمشي بشويش ؟
قالت ده قوز الست اللي من شويه عاوزه تسوء ..
قلت خلني اروح صالة الانتظار اسولف معه شوي بدل هالبقره ..
السلام عليكم ..
عليكم السلام ..
وبعد صمت دقايق .. قال :
تصور ياخي لو زوجتك مدرسه و تبي تسوق ..
قلت انا عازب منيب متزوج ..
قال انطم وخلني اكمل ( مارديت عليه مسكين نفسيه نفسيه ) ..
اقولك لو زوجتك مدرسه و تبي تسوق وتقدر تشتري سياره .. بس انت رافض وجايب لها سواق يوديها ويجيبها.. وقالت ابي اتطلق .. وش بتسوي ؟!
بطلقها ..
تطلقها بعينك .. شلون تطلقها وعندك عيال والبيت باسمها ؟!
آها .. طيب ليه انت رافض ؟
انا خايف عليها .. المجتمع ماراح يتقبل الفكره الا بعد تطبيقها بخمس او عشر سنوات .. وانا مابي زوجتي وعيالي يكونون في خطر كل ماطلعوا اشيل همهم ..
طيب ياخي ماتوصل طلاق .. زوجتك اشوفها ملتزمه ومحتشمه في لبسها .. وش هالفكره اللي قلبت الناس وامتحنونا فيها .. يارب لطفك وسترك .. طلاق ؟؟ كبيره ياخي شوي ..
ايه ياخوي زوجتي ملتزمه وتقول السواق مهوب محرم لها ومايجوز تركب معه .. وانا شغلي مايسمح اوديهم واجيبهم بانتظام .. دوامي صعب شوي
والله بعد هي معها حق ياخي .. اقولك .. انا انسان وقح وسافل ومعليش يعني لو قلت لك
بالطقاق انت وحرمتك ومالي شغل معليش .. الدكتور اكيد عنده علاج لحالتكم .. انا ماعندي ..
طلعت من عنده بروح لـ اللمبي الا هي في وجهي .. :
استاز سولطان سلاطان سيليطين .. دورك ..
هاهاها ؟؟ خفة دم هذي ياسافله ؟ ..
لئه بس عشان ماتئرفنيش باسمك تاني .. تفضل خش ع الدكتور يانفسيه ..
وش هالعياده الزباله هذي ؟ ..
دخلت غرفة الدكتور.. لقيته يصيح .. وحاط يديه على راسه ..
شفيك دكتور سلامات .. !!
ابداً مافيش حاقه .. بس تعبت تعبت تعبت يبني من الحالات المعفنه دي .. كل شوي داخل عليا
واحد ومراتو .. دي عاوزه تسوء ودا رافض يخليها تسوء .. اعمل ايه انا ؟؟
انا حي الله دكتور نفسي مش مسؤل في الدوله ولا مفتي .. بيرموا بلاويهم عليا ليه .. ليه ..
طيب طيب دكتور تحب اجيك وقت ثاني ..؟ <-- اخلاق

لا يبني .. اتفضل ع الكرسي .. لأ لأ مش ده .. الكرسي الطويل ده ..
انا عاوزك تئلع قزمتك و تتمدد ع الكرسي الطويل ده و تاخد راحتك ع الآخر ..
وش ائلع قزمتي ؟ والله مائلعها ولانيب متمدد ؟
يبني عشان تاخد راحتك وتسترخي .. وماتوسخش الكرسي بالقزمه ..
دكتور ارجوك .. لاتستغل نفسيتي وتفهمني غلط .. انا انسان شريف
شريف ايه يابني ؟! ايه دخل الشرف في القزمه .؟!
يادكتور .. التساهل في الاشياء البسيطه يسحب اشياء كبيره .. الحين أئلع القزمه وبعد شويه شي ثاني ..؟!
واللهي مش حـ تئلع حاقه تانيه بس انتا اتمدد وائلع قزمتك وخد راحتك ..
عاوزك تعتبرني حبيبتك .. خطيبتك .. مراتك ..
شفت شفت يادكتور .. بدينا بدينا ؟؟
يبني ارقوك خف عليا شويه .. انا بئول كدا عشان الواحد بيرتاح لخطيبتو ولا مراتو ..
طيب دكتور .. بئلع القزمه .. بس اخاف فيه كاميرات هنا ؟
كاميرات ؟؟؟ ليه
يعني .. خاف ينتشر الخبر او تبتزني مثلاً مثلاً ؟! ..
انتا بتئول ايه يابني ؟؟ ابتزك عشان بتئلع القزمه ؟ ايه النفسيات دي .. دنتا حالتك صعبه أوي
اتمدد يبني ومتخفش .. وئولي ايه مدايئك بالزبط ..
والله يادكتور ماعمري فكرت ادخل عيادة نفسية .. بس تعبت تعبت تعبت يادكتور ..
استرسل ياسولطان .. ئول يبني ئول .. ماتخبيش حاقه عليا .. بس استنى شويه اشغل التسقيل ..
وش بتسجل ؟
حـ سقل القلسه دي ..
وين البنات ..؟
بنات ايه يبني ؟
يعني جلسه بدون رقص ووناسه ؟ وش هالجلسه
يبني قلسة العلاق مش قلسة وناسه .. ايه الناس دي ... انا متصبح بوش مين النهارده ..؟!
معليش معليش دكتور .. انا مرتبك مرتبك سامحني ..
وآدي التسقيل اشتغل .. تفضل ئول ..
اقولك يادكتور .. في ليلة من الليالي .. كنت جالس انا وعبيد .. تعرف عبيد صديقي ؟
لئه معرفوش ..
عبيد الفقمه ؟ ماتعرفه
يبني خلصني .. مالو عبيد الفؤمه ده ..
طيب طيب .. كنت جالس مع عبيد في ليله من الليالي السود .. طبعاً انتا يادكتور ماتعرف عبيد ؟
ئولت لك يبني لأه .. كمل ربنا يسترها معاك وخلصني ..
طيب طيب دكتور .. كنت جالس معاه في ليله معتمه .. ومانتبهت الا على صوت عبيد يقول :

M!SS HTLERH الخميس يونيو 02, 2011 9:26 am

سليطين ..
....... سليطين ..
................. سليطين ...!!
انت انت لاتتلفت .. اناديك انت ..
انا سليطين ؟
ايه
ليش ..
وش اللي ليش ؟ انت اسمك سليطين
قل قسم بالله ؟
قسم بالله ؟؟؟ وش فيك سليطين ؟
لا لا ولا شي .. سم آمر وش تبي ..
وراك مسرح ؟ وش تفكر فيه ..
معليش عبيد خشيت جو وتخيلت اسمي مهند وعايش قصة حب .. نسيت اسمي سليطين ..
لاتقول بعد اسمها لميس يالقديم ؟ ..
ياخي بدل هالاسئله تخيل معي انك يحيى وانت ساكت ..
سليطين ؟؟ انت تحب ومخبي علي ؟؟ ياخي قول وفضفض انا كاتم اسرارك ..
والله ياعبيد انت كاتم انفاسي .. منتب كاتم اسراري .. ليتك توريني عرض كتافك ..
افاااااا سليطين تطردني وانا صديقك الصدقي ..!
عبيد تراك حومت تسبدي .. وانا في ذروة خيالي واقردنها تفتش الغطوه الا انت خربت علي ؟!
وانت تتخيل .. تتخيل وحده متغطيه .. وش هالخيال المخيس .. ؟!
ايه ياعبيد .. خيالي مؤدب مهوب قليل أدب مثل خيالك ..؟!
طيب آخر سؤال سليطين .. هي لابسه نقاب ولا متلثمه ؟!
سؤالك ياعبيد له مآرب آخرى .. ادري وش تقصد بس منيب معلمك انها متلثمه ..
اسف سليطين خربت عليك وماشفت وجهها .. بس انت ماقلت لي انك تقردنها ؟ ..
وشلون اقولك وانا اتخيل ؟ اولع لك لمبه حمراً مثلاً لين جيت هالمقطع ؟! ولا اطلع لك بالونه فوق راسي مكتوب : عبيد لاتخرب علي تراها بتفتش ؟! ..
سليطين اللي بيننا انت عارفه ماعندنا اسرار على بعض وكل واحد يعتبر مرآة الثاني .. وكانك تحب وحده علمني اساعدك .. تراي اعين واعاون ..
عبيد والله احياناً يطلع منك درر .. احياناً يعني مهوب دايم .. بس هالمره كلامك مايمشي علي ..
وش تعين وتعاون ؟؟ هالكلمه مريبه ياعبيد .. خربتها الله يهديك ..
طيب طيب براحتك سليطين انا بسري عندي شغل بكره بدري لازم اقوم مبكر ..
بكره الخميس ؟ وش هالشغل اللي يصحيك بدري ..!
ادري خميس ولاعندي شغل ولاني صاحي بدري بس بحفظ ماء وجهي وانت طاردني ؟
ماطردتك ياخي ؟ بس قلت لك خلني اتخيل وانت تبي تتخيل تخيل .. ولا رح عندك شغل بكره :
وشو شغله ؟
اطلع برا ..
طيب ..

بعد ماكنت متردد اقوله يادكتور وش مشغل بالي .. فكرت اتصل فيه واعلمه بعد ماطلع من عندي .. :
آلو .. هلا عبيد .. وينك فيه ..
انا في البيت ؟ لاتكون غيرت رايك وتبيني ارجع ؟ مايمدي راحت عليك .. وش عقبه .. ايه ايه
عبيد انطم مابيك تجي .. ابي اتكلم معك بالتلفون ..
طيب تكلم وش فيك ..
عبيد انا بقولك شي بس لو مانت غالي واثق فيك ماقلته لك .. انت عارف هالشي ؟
ايه سليطين انت اكثر من قريب وأخ و صديق .. بس اشغلتني عليك .. تبي سلف ؟
ايه ياعبيد بن طلال ؟ وش عندك اتسلف منك ؟؟ ولو سمحت عبيد لاتبادر بشي لو سمحت يعني ..
طيب طيب سليطين بسكت وانت تكلم ..
اسمع ياعبيد .. انا قررت اتزوج .. وكلمت ابوي وامي وموافقين ورتبت كل شي ..
مبروووووووك ياسليطين واخيراً سمعت كلامي وبتتزوج مثلي ..
ايه ياعبيد .. وشفت اللي تخيلتها ...
ايه شفيها ..
تصدق ياعبيد .. تشبه لك ..
ههههههه سليطين اكيد ملكة جمال
للأسف ياعبيد فيها شي منك .. للأسف للأسف <--- يهز راسه
سليطين يمكن من كثر ماتتأمل في وجهي تخيلت وحده تشبهني .. بس غريبه انها عجبتك ؟
هذا اللي صار ياعبيد .. من عقب ماكنت اتعوذ منك كل ماشفتك صرت الوجه المفضل عندي ..
لهالدرجه تشبهني ياسليطين ؟؟
ارجوك عبيد لاتذكرني كل شوي انها تشبه لك ترى يضيق صدري ..
مع انك دايم تعايرني ياسليطين بوجهي وتقول كنك في حفله تنكريه ولابس قناع وجه امينه رزق من كثر العفوط في وجهك ..
معليش عبيد انسى كل شي راح وخلنا في الحين .. المهم .. تعرف اسمها ؟
لا وش يعرفني فيه ؟
اشوى .. اسمها هند ياعبيد .. هند .. سامع ؟ هند
طيب وش اسوي باسمها ؟
اسمها مايعني لك شي يعني ؟؟
لا ..
واسم امها ساره .. وتحني البزران في الاعياد .. مثل امك سوير ياعبيد .. صحصح معي ياعبيد ..
بعد لاتقول اسم ابوها سليمان ؟
الا .. وابوها سليمان شريطي سيارات .. يلعب على الناس .. مثل ابوك ياعبيد .. معي انت ياعبيد ؟؟
يووووووه سليطين شوي تقول عندها اخو اسمه عبيد هههههه
للأسف .. ايه بس راحت العفوط اللي في وجهه .. لما كانت قطرة العرق يبي لها اسبوع تنزل من جبهته لين توصل دقنه .. من كثر المطبات والملفات والعفوط .. ياعبيد .. وعساك تفهم ؟
ايييييييييه ياسليطين والله انك اوفى صديق في العالم .. رايح تدور عائله تشبه عائلتنا تتزوج منهم
عبيد .. ممكن اذبحك ؟ اقتلك ؟ ادوس في بطنك ثواني ؟؟
ليه سليطين ؟ سلامات وش جاك علي ؟
ماجاني شي بس بنهي المكالمه .. مع السلامه ياعبيد

M!SS HTLERH الخميس يونيو 02, 2011 9:28 am

لحظه لحظه سليطين .. ممكن سؤال ؟
تفضل ياعبيد وخلصني ..
اللي تخيلتها ومثل اسم اختي وابوها ابوي وامها امي واخوها انا .. طويله وبيضا وشعرها ناعم وتوها متخرجه من الجامعه ؟
ايه ايه ايه ياعبيد بالضبط .. الله يفتح عليك .. عساك عرفتها ؟
والله انك وفي ياسليطين وانا محظوظ بقرابتك وصداقتك .. رايح تدور على بنت نفس مواصفات اختي هند من حبك لنا ؟
طررررررررررراخ <---- صكيت السماعه بوجهه
وشوي الا رجع يتصل وقررت اقوله ... :

عبيد .. اختك هند هي اللي ابي اتزوجها ..
وسكت شوي .. وجتني ام الركب وقمت اصبصب عرق .. وشوي الا صوت البعير :
مبرووك ياخي قول لي من اول وجالس تلف وتدور ؟؟؟ ابرك الساعات اناسبك ياسليطين
يعني موافق ياعبيد وماعندك مانع ؟
ايه موافق ونص .. وانا وين القى واحد مثلك اعطيه اختي .. وامي تحبك ياسليطين وبتفرح بك ..
طيب قلي من اول . اتلفت اعصابي وانا الف وادور .. تخبر ياعبيد حنا صداقة عمر وسافرنا سوى وخنبقنا سوى وخفت ترفض لإنك عارف تاريخي المخيس زين ..
لالا ياسليطين .. لإني اعرفك زين ومتربين سوى ودافنينه سوى .. اعرف انك بتتغير عقب الزواج وبتصير آدمي
يعني انا حيوان ياعبيد ؟؟ هذي آخرتها ؟ تذلني عشان بتزوج اختك ؟
ياسليطين لاتفهمني خطا .. اقصد اننا بطلنا السفريات والخنبقه والروحات اللي مالها سنع وعقب الزواج بتنسى هالاشياء كلها وبتصير تاريخ واندفن .. علمني بس متى ناوين تشرفونا ؟
قريب ياعبيد قريب ..

طيب يا أوستاز سليطين .. انتا بتعرف هند اخت الاستاز عبيد منين ..؟!
مرقمها يادكتور ..
مرئمها يعني ازاي ؟
يادكتور الله يهديك وش هالسؤال .. عبيد واخته هند عيال خالتي سوير .. ومتربين سوى وكنت احبها من صغري وهي تدري اني احبها لكن حب برئ ومابيني وبينها أي تواصل بس كنت انتظرها تخلص جامعه واتقدم لها رسمي .. لكن خفت من عبيد اللي مسربتين انا وياه سوى ومخنبقين سفريات وسهرات استراحات وخربطه.. انه مايوافق .. شفت اني انسان شريف .. يادكتور
يبني ئرفتني بكلمة شريف كل شويه .. ايه ده .. طيب هيا بتحبك ؟! ..
سؤال مهم يادكتور .. صراحه مدري بس اتضح لي ان كل ماجاها احد يخطبها رفضت من كانت اولى جامعه وهي تنخطب لحد ماتخرجت .. لكن مارضت بأحد ..
طيب كمل يبني .. كمل

خطبتها ورتبنا كل شي يادكتور .. وصرت اتكلم معها باستمرار بالتلفون واتفقنا على كل شي لحد يوم الملكه ..
تملكت عليها وحددنا الزواج بعد العيد اللي كان باقي عليه 3 شهور .. ومن هذاك اليوم يادكتور وبمجرد ماتملكت عليها تغير حالي معاها وصرت كل ماشفتها اتخيل اني اشوف وجه عبيد .. بالرغم انها ماتشبه له ابداً وفرق بينهم مثل السما والأرض لكن يادكتور صورة عبيد عيت تفارق خيالي لما اشوفها .. وحسيت ان هالشي مجرد وساوس لحد مازادت الحاله خاصه واني صرت عندهم باستمرار بحكم انه بيت خالتي واخوها صديقي وهي زوجتي بعد ماتملكت عليها ..

ايوه يبني .. كمل :
تعبت نفسياً يادكتور وهي برضو تعبت من كثر ماتهرب منها ..ورحت اكلم امي منيره.. تعرف امي يادكتور ؟
لئه .. وانا اعرف امك منيره دي منين ..؟!
اشوى .. لو قلت اعرفها قتلتك .. المهم كنت سهران افكر ورحت لأمي وهي تصلي آخر الليل .. :
يمه ..
سم سليطين ..
سم الله عدوتس .. خلصتي صلاة ؟
ايه ياولدي ليتك تذوق حلاوة صلاة تالي الليل ..
ان شالله يمه .. ( خلينا نخلص فروضنا اول ) ..
سمعتك ياسليطين .. سمعتك سمعتك ..
يمه ؟ كم مره اقولتس لاتسمعين اللي احطه بين قوسين ؟
ههه هه هه هـ ( تضحك ) ..؟!
وش بغيت ياسليطين اخلص وانا امك ..
ابي اقولك شي يمه بس متردد ..
وشو ؟
مابي ..
وش ماتبي ؟
مابي وبس ..
وش ماتبي يالعله ؟
مابي اعرس .. مابي مابي مابي ..
وشوووووووووووووووووووووو ؟؟؟ ولييييييه وش صاير ؟
ماصار شي بس غيرت رايي يمه ..
اسمع ياسليطين .. هند بنت اختي ومثل بنتي ولاتفشلنا عند الله وخلقه .. تعوذ من بليس ياولدي ..
يمه .. مقدر اقولك ليه بس صدقيني الافضل اني ماتزوجها ..
آها بس .. رح انقلع عن وجهي ولاعاد تعيد هالحتسي ..
ماما ؟؟؟
ماما بعينك .. بلا بعينك .. انقلع غرفتك ..
يمه ؟
يمه بعينك .. بلا بعينك .. قم انقلع عني <---- ترجمه بالجلال
وماقدرت اقولها السبب .. حسيت ماراح احد يصدقني يادكتور ..
ايوه وحصل ايه بعد مارمتك امك بالقلال ..
حطيت ايدي على فمي وجلست اصيح اهئ اهئ ورفعت ثوبي وركضت لغرفتي فوق ..ولما طلعت غرفتي قلت لازم اكلم هند .. وانهي الموضوع ..

آلو .. هند كيفك ..
بخير الحمدلله .. مانمت ؟
لا مانمت ..
اخيراً جيت على بالك وكلمت ..!
هند انا عندي مشكله وبدخل مباشره في الموضوع ..
قول .. اشغلت بالي ؟
انتي ليه رفضتي اللي يجون يخطبونك ..!!
انا مارفضت اصلاً .. هم بمجرد يجون البيت ينتهي الموضوع قبل يبدا ..
شلون ..!!
مادري .. انا ماكنت ابي اتزوج الحين سلطان وابي اكمل دراستي بس ماقدرت ارفضك ..
طيب لحظه فهميني اول شلون ينتهي الموضوع قبل يبدا ..؟!

مادري سلطان .. الموضوع طويل بس ترى كلهم ثلاثه .. وبنفس الطريقه يشوفوني اهاليهم في زواج او مناسبه واعجبهم ولما يجون يكلمون امي وادخل عليهم تتغير وجيههم كأنهم شايفين وحده غير اللي شافوها .. من بعدها امي ماصارت تستقبل احد عشان مايأثر على دراستي .. حتى انت سلطان فكرت انك مثلهم وماراح يتم الموضوع لكن لما مشى رجعت ثقتي بنفسي .. لكن بعد الملكه لما تغيرت علي حسيت انك شفت اللي هم شافوه وان الموضوع مجرد انك كنت حافظ وجهي وشكلي من وانا صغيره .. انا ياسلطان حاسه ان فيه شي غلط .. فيه شي غلط ..! ( دخلت في نوبة بكاء يادكتور ) ..

بعدها اتضحت المشكله يادكتور ان هند متعرضه للسحر من خلال الاعراض اللي تنتابها وصارت تراجع شيخ تقرا وتأكد تعرضها لسحر وصارت تروح يومياً عند الشيخ مع امها وعبيد واحياناً انا .. حتى وصلنا لآيات اعطاها الشيخ لـ هند وقال اقريها قبل النوم يومياً وبتطلع لك اللي سحرتك في الحلم وكانت المفاجأه يادكتور ان اللي طلعت لها في الحلم اكثر من مره .. هي عمتها اخت ابوها من الأب .. واسترجعت هند الذكريات وتذكرت بنت عمتها وهي تدخل غرفتها وشافتها تاخذ من اغراضها ( ملابس وامشاط ) واشياء ثانيه وتخبيها في شنطتها وضنت انها محتاجه ومستحيه وسكتت عنها ماقالت لها شي .. واثاري عمتها كانت تبيها لولدها وهم رافضينه لإن الولد ماهو كويس غير انهم من سكان الغربيه وابوها وامها مايبونها تطلع من الرياض وتبعد عنهم .. وسحرتها على انها ماتتزوج وتتعطل .. وصار كل من جا يشوفها في البيت يتهيأ له شكل ثاني لـ هند غير الشكل اللي يشوفونها فيه برا البيت ..! وجربت يادكتور اشوف هند في بيتنا لكن ماتغير الوضع لإن اللي سحرتها عرفت انها تعدت المرحله وبتتزوج وزادت في السحر .. وصممت يادكتور بعد هالسالفه اتزوجها ونواصل العلاج ونحاول في عمتها بعد ماتقطعت بنا السبل معها لإنها رافضه تعترف ودخلوا اهل الخير لكن مافيه فايده وصار بينهم قطيعه ودعاوي وكل يكره الثاني وتقفلت الابواب .. وبعد ثلاث سنوات من زواجي منها وهي مثل اخوها عبيد مابيننا أي شي الا زواج بالأسم .. وماقدرت امارس حياتي الزوجيه الطبيعيه لإني اعتبر اللي نايم معي عبيد .. عبيد يادكتور انت تعرف عبيد ؟
ئولتلك يبني ماعرفوش واللهي مابعرفوش ..
طيب طيب دكتور معي صورته بوريك اياه ... شفه هذا عبيد ..
ياااااسااااااتر يااااسااااااتر .. إيه ده .. هي بتشبه لوه ؟ ازاي ده طلع بني آدم ؟
ارجوك يادكتور .. ترى عبيد ولد خالتي وصديقي .. لايهمك شكله تراه شقردي ويعجبك ..
يبني دنتا حالتك صعبه أوي ومحتاقه سبعمية قلسه عشان انسيك الوش ده .. ياسااتر .. ايه ده
دكتور يرحم والديك انا يومياً اتعذب كل يوم اشوفها من بعيد فتاة أحلامي واحلى وأرق بنت لكن وهي تسولف وبعيده عني لكن لما اقرب منها اشوف وجه عبيد وانت شفت صورته ماتقدر يعني شسمه ؟ صح .. ومحتار وابيك تعطيني حل من الحلول :
1- استمر معها واواصل العلاج رغم مضي ثلاث سنوات وماتغير شي الا تحسن طفيف وانا ابي عيال وامارس حياتي الزوجيه الطبيعيه..؟!
2- اطلقها وكل واحد يشوف حاله رغم اني احبها وتحبني وماينقصنا شي الا انها مثل عبيد .. صايره صديقي بس سوالف ..!!
3- اقتل عبيد او احط له منوم واوديه تهريب لطرابلس في ليبيا واكتب على ظهره قائد الثوار يمكن ينحل الموضوع وتروح الصوره ويخرب السحر ..؟!
4- ابي طريقه كيف اخلي عمتها تبطِل السحر مع العلم ان جميع المحاولات الممكنه معها .. ماسوت شي ..
5- معليش دكتور آخر سؤال .. انت تعرف عمتها اللي سحرتها ؟
تف من بؤك .. اعوز بالله اعوز بالله .. دي مش بشر دي اللي بتسحر بنت اخوها .. ايه الئلوب الآسيه دي .. ئوم يبني الوئت خلص والساعه وحده .. القلسه انتهت .. وشوف حد يقاوب على اسئلتك دي .. انا مش نائص بلاوي .. حـ ئفل العياده .

<--- برباره

<<ارجو من الاعضاء الكرام ان يجدوا لي حلا..!

**كــــايدتهم** الأربعاء يونيو 08, 2011 10:13 pm

ياشييخ من قريت الموضوع وجتني زيراان استنزلت
bounce

والله وسليطين ذاا طاح ولحدن سمى علييه
<< ياحليل المراهقين اللي كذاا تطلع منهم براءه (( affraid

والسستر هي اللي شاغلتن بالي وش هالنفسيات ذي اعوذ بالله >> بالعون ياسولطان سلاطان سليطين
عبيد ياعبييد ويييينك عازمك ع العشاء اقلط ماحوولك احد
هند تلك الورده الجميله flower

ماهو ذنبك ؟؟ لكن تبين النصيحه خليك عند المشايخ لييين مايكتب الله وينفك
الا هالعمه الللي تسسسوي هالفعل الشنيع وينه < شبااااب ماودكم نقوم عليه الين تعترف ترى نوفي ونكفي ونحل قصة الحب من طرفين << متأثر اخوكم
سليطين ايها القيس تبي الحل خذه مني وبتعيش حياتك الزوجيه على مايرام
بس تعاال معنا عند هالعمه ومايصير خاطرك الا طيب

هتلر تعال وانا اخوك متأكد انك << والا تدري خلن ساكت
تسلم يابعدي وثاني مرره جب الحل معك لاني وبصراحه اتعبت مخيخي وانا افكر scratch

شاكرك ياكبيييييييييييير Like a Star @ heaven

M!SS HTLERH الثلاثاء يونيو 21, 2011 3:57 pm

بصرآحه كايدهم مقدر تعبك في العثور على الحل ..!
لكن..
خلاص مو لازم تبحث
لاني مقدر ان مخك مايشتغل الا مره بالسنه فخله وقت ثاني يمكن تحتاجه..

ياهلي الروح تعبانه..جيبوا لي دكتوووور نفسيه..

ياهلي الروح تعبانه..جيبوا لي دكتوووور نفسيه..

رد: ياهلي الروح تعبانه..جيبوا لي دكتوووور نفسيه..

رد: ياهلي الروح تعبانه..جيبوا لي دكتوووور نفسيه..

رد: ياهلي الروح تعبانه..جيبوا لي دكتوووور نفسيه..

رد: ياهلي الروح تعبانه..جيبوا لي دكتوووور نفسيه..

رد: ياهلي الروح تعبانه..جيبوا لي دكتوووور نفسيه..